Manufarmu Kano:Ku rike aikin Jarida da gaskiya da kuma hadin kai-Waiya

Kwamishinan Yada Labarai da Harkokin Cikin Gida na Jihar Kano, Kwamared Ibrahim Abdullahi Waiya, ya yi kira ga editocin kafafen yada labarai a jihar da su gudanar da ayyukansu bisa gaskiya, kwarewa da kishin kasa, yana mai bayyana kafafen yada labarai a matsayin abokan hulɗa masu muhimmanci wajen samar da zaman lafiya, hadin kai da ci gaba mai dorewa.

Wannan kiran na kunshe ne cikin wata sanarwa da Daraktan Ayyuka na Musamman, Sani Abba Yola, ya fitar kuma aka rabawa manema labarai a ranar Talata.

Kwamared Waiya ya bayyana wannan kira ne yayin wani taron tattaunawa na yini guda da aka shirya tare da editoci, wanda Ma’aikatar Yada Labarai da Harkokin Cikin Gida ta shirya tare da hadin gwiwar Nadeem Media Consults. Ya jaddada kudirin gwamnatin jihar na karfafa hadin gwiwa da masu ruwa da tsaki a kafafen yada labarai da kuma cike gibin da ke akwai wajen mu’amala da su.

A cewarsa, Gwamnatin Jihar Kano ba ta da niyyar tauye ‘yancin aikin jarida, sai dai ta kuduri aniyar bai wa ‘yan jarida damar gudanar da ayyukansu cikin ‘yanci bisa ka’idojin ladabi da kwarewar sana’a. Ya sake tabbatar da goyon bayan gwamnati ga ‘yancin fadin albarkacin baki da kuma kyakkyawar mu’amala da kafafen yada labarai.

Kwamishinan ya tunatar da ‘yan jarida cewa, baya ga nauyin aikinsu na sana’a, suna da wani hakki ga al’umma. Ya jaddada cewa tsaron jama’a, muradun kasa da zaman lafiya tsakanin al’umma dole su kasance ginshikin rahotanni, musamman a wannan zamani na sauyin fasahar zamani da sabbin hanyoyin sadarwa.

Yana bayyana editoci a matsayin “alkalai a dakin labarai,” Waiya ya ce ya dace su duba illolin kowace bayani kafin wallafawa, su magance ayyukan da ba su dace ba, tare da kasancewa masu sanin abubuwan da ke faruwa a gida da waje. Ya bukaci editoci da su wuce iyakoki, su zuba jari a horarwa da kara kwarewa, tare da daga matsayin sana’ar jarida domin kara amincewa da rawar da kafafen yada labarai ke takawa a cikin al’umma.

Kwamared Waiya ya kuma jaddada kokarin da gwamnatin jihar ke yi wajen karfafa hadin kai da fifita muradun Kano gaba daya a kan bukatun kai-da-kai, yana mai nuni da sabbin sauye-sauyen siyasa da ake yi domin sake daidaita jihar zuwa turbar ci gaba.

Ya tabbatar wa editoci da ci gaba da hulda da goyon bayan ma’aikatar domin inganta aikin jarida, tare da yin kira gare su da su taimaka wajen wayar da kan jama’a da kuma ba da gudummawa wajen gina Kano mai zaman lafiya, ilimi da hadin kai.

A yayin taron, Mataimakin Farfesa Sule Ya’u Sule ya gabatar da jawabi mai taken “Wane Ne Edita?”, yayin da Malam Muktar Magaji ya gabatar da takarda mai taken “Edita da Dan Jarida: Alaka Don Inganta Ayyukan Dakin Labarai.”

A nasa jawabin godiya, wani mamba na Kwamitin Tsare-tsare na Kungiyar Editocin Najeriya (Nigerian Guild of Editors), Kwamared Umoru Ibrahim, ya yabawa Kwamishinan bisa shirya tarukan kara kwarewa ga ‘yan jarida da kuma saukaka musu yin rijista da kungiyoyin sana’a a jihar.