Malaman Gwale Sun Nemi Shugabanci Mainagarta a NUT, Sun Bukaci a Dakatar da ‘Yan Takara Mutum Uku Kafin Zaɓen Reshen 2026

Daga Comrade Jae

Malaman makaranta na Ƙaramar Hukumar Gwale, Jihar Kano, sun yi kira da a samar da shugabanci nagari, gaskiya da rikon amana gabanin zaɓen shugabannin reshen Ƙungiyar Malaman Makaranta ta Najeriya (NUT) da za a gudanar a watan Agustan 2026 a dukkanin kananan hukumomi 44 na jahar Kano, inda suka jaddada cewa bai kamata a bar mutanen da suke zargi da rashin amana su tsaya takara ba.

Da yake magana a madadin malaman da abin ya shafa, Comrade Auwalu Shuaibu Jae ya bayyana cewa lokaci ya yi da za a kawo ƙarshen zaɓen shugabannin da ba su da nagarta, yana mai cewa ƙungiyar NUT tana buƙatar shugabanni masu gaskiya da rikon amana waɗanda za su tabbatar da haɗin kai, adalci da kare muradun malaman makaranta.

A cewar Jae, shugabannin da ke kan mulki a halin yanzu kuma suke neman a sake zaɓensu ba su cancanci amincewar mambobin ƙungiyar ba. Ya yi zargin cewa sun aikata abubuwan da suka saɓa wa tanade-tanaden Kundin Tsarin Mulkin NUT. Ya ambaci Sani Rabi’u Dandago da Dahiru Sani Hausawa, yana zargin cewa a baya an same su da laifukan rashin da’a da kuma cin amanar amana.

Jae ya kuma yi zargin cewa mutanen biyu sun kasance cikin waɗanda aka samu da yin almundahana wajen biyan diyyar filayen wasu malaman makaranta. Ya ce an yi amfani da takardun bogi da sa hannun ƙarya yayin gudanar da aikin biyan diyya, bayan an ba su alhakin tantance malaman da abin ya shafa domin a biya su kuɗaɗensu, bisa umarnin tsohon Shugaban NUT na reshen Gwale, Comrade Aminu Salisu, a shekarar 2015.

Hakazalika, ya zargi mutanen biyu da kasancewa cikin masu haddasa rashin zaman lafiya a Hukumar Ilimi ta Ƙaramar Hukumar Gwale (Gwale LGEA), yana mai cewa suna nuna rashin girmamawa ga shugabannin hukumar ilimi, ciki har da Sakataren Ilimi. A cewarsa, duk da waɗannan zarge-zarge, ba a taɓa ɗaukar matakin ladabtarwa a kansu ba saboda goyon bayan da suke samu daga wasu masu ruwa da tsaki.

Jae ya kuma yi ikirarin cewa, a wani lamari da ya faru kwanan nan, Dahiru Sani Hausawa ya umarci wasu malamai da su yi fito-na-fito da duk wani shugaba da ya yi musu ba daidai ba. Ya ce wannan zargi ya biyo bayan wani taron masu ruwa da tsaki da aka gudanar a Hukumar Ilimi ta Gwale ƙarƙashin jagorancin Shugaban Ƙaramar Hukumar Gwale, Hon. Abubakar Mu’azu Mojo.

Wasu malaman makaranta a Gwale da suka nemi a sakaya sunayensu su ma sun nuna rashin gamsuwarsu da salon shugabancin Sani Rabi’u Dandago, inda suka zarge shi da rashin haƙuri da ra’ayoyin da suka saɓa da nasa da kuma ƙin karɓar gyara ko shawara.

Saboda haka, malaman sun yi kira ga Shugaban Ƙaramar Hukumar Gwale, Hon. Abubakar Mu’azu Mojo, da Shugaban NUT na Jihar Kano, Comrade Baffa Ibrahim Garko, da Shugaban NUT na Ƙasa, Comrade Titus Amba, da su sa baki tare da hana Sani Rabi’u Dandago, Dahiru Sani Hausawa, da Sani Adamu tsayawa takara a kowace kujerar shugabancin NUT a zaɓen reshen Gwale mai zuwa.

Sun bayyana cewa ɗaukar irin wannan mataki zai taimaka wajen dawo da zaman lafiya, haɗin kai da amincewa tsakanin mambobin ƙungiyar a Ƙaramar Hukumar Gwale, wadda ita ce mahaifar Gwamnan Jihar Kano, Alhaji Abba Kabir Yusuf.