Jamiyyar NNPP ta shiga rikici a Kano: Ƙungiyar Caucus Ta Yi Watsi da Kwankwaso Yayin da Sauya Shekar Gwamna Abba Yusuf ke Barazana Ga Rushewar Siyasar Kwankwasiyya gabaki ɗaya.

Siyasar Kano Ta Ƙara Ƙamari: Taron Caucus na NNPP Ya Ƙare da Kaskanci Bayan Watsi da Ƙusoshin Jam’iyyar su ka yi.

Siyasar Kano ta girgiza a yau bayan wani taron caucus na matakin ƙoli da jagoran ƙasa na jam’iyyar NNPP, Sanata Dr. Rabi’u Musa Kwankwaso, ya kira. Rahotanni sun nuna cewa mafi yawan fitattun mambobin jam’iyyar NNPP Melitta sun kaurace wa taron. Taron, wanda aka gudanar a gidan jagoran na Miller Road, an ɗauke shi a matsayin gaggawar shawo kan rikicin da ke ƙaruwa dangane da rahoton sauya shekar Gwamna Abba Kabir Yusuf zuwa jam’iyyar APC mai mulki.

Taron ya gudana ne a daidai lokacin da masana ke ƙara tabbatar da cewa Gwamna Abba Kabir Yusuf na ci gaba da shirin sauya shekarsa ba tare da amincewar ko sa hannun Sanata Kwankwaso ba — al’amari da ya karya tsayayyen tunanin cewa Kwankwasiyya na tafiya ne da jagoranci ɗaya . Wannan hakan ne silar rabuwar kai da ke cikin jam’iyyar NNPP a Jihar Kano.

A wata alama ta rashin amincewa da ba a taɓa gani ba, kusan duka mambobin caucus da sauran masu ruwa da tsaki da aka gayyata— ciki har da sanata Rufa’i da ‘yan majalisar wakilai, ‘yan majalisar dokokin jiha, kwamishinoni, shugabannin kananan hukumomi, shugabannin jam’iyya da manyan jiga-jigan caucus — sun kaurace wa taron. Ɗai-ɗaikun magoya bayan Kwankwaso daga wajen jihar Kano ne kawai aka gani a wajen taron, wanda hakan ya zama abin kunya ga mutum wanda a baya ake kallon sa a matsayin gwarzon siyasar Kano.

 

Yayinda taron ke yunkurin samun tasiri, fitattun ‘yan NNPP da shugabannin caucus an gan su a lokaci guda suna kai ziyarar goyon baya ga Shugaban riko na NNPP, Hon. Imam Zubairu (Abiya), wanda ake ganin yana da cikakken goyon bayan Gwamna Abba Kabir Yusuf. Wannan mataki ya bayyana karara cewa cibiyar iko a cikin jam’iyyar ta fara motsawa daga inda ta saba kasancewa.

A martani game da wannan rikicin, wani jigo a jam’iyyar APC da ya buƙaci a sakaya sunansa, ya bayyana farin cikinsa kan shirin sauya shekar Gwamna Abba, yana cewa: “Dukkanmu a APC mun shirya domin goyon bayan Gwamna Abba Kabir Yusuf domin ci gaban Kano. Zuwa nasa zai taimaka mana mu tabbatar da nasarar Shugaba Bola Ahmed Tinubu a zaɓen 2027.”

Game da yiwuwar shigowar Sanata Kwankwaso APC, wannan majiya ta ce a fili: “Ba ma buƙatar Kwankwaso a APC. Idan ya zo, shugabannin jam’iyya, ‘yan majalisa, har da Sanata Kawu Sumaila za su fice. Ba za mu iya aiki da shi ba, kuma ba za mu yi ba.” Ya ƙara da cewa gwamnan ya kamata ya haɗu gaba ɗaya da jagororin APC, yana mai jaddada cewa: “Dr. Abdullahi Umar Ganduje dattijo ne. Yau gaskiyar sa ta bayyana.”

Dambarwar siyasa ta fara yamutsa hazo a cikin jam’iyyar NNPP a matakin ƙananan hukumomi. Wani shugaban jam’iyya a Kano Central, wanda ya nemi a sakaya sunansa, ya bayyana  cewa: “Yanzu mun gane cewa Dr. Abdullahi Umar Ganduje ba shi ne matsalar ba. Mun ci zarafinsa da zagi da ƙarya, muna roƙon gafararsa.”

Masu sharhi kan siyasa suna nuna mamaki da cewa abin da Dr. Ganduje ya shafe kusan shekaru huɗu yana ƙoƙarin yi—wato cire Kano daga hannun Kwankwaso—ana ganin Gwamna Abba Kabir Yusuf ya yi nasara da shi cikin kasa da awanni 48. Yadda abubuwa ke canzawa da sauri ya sa har masu fashin baki su ke ta maganganu irin na siyasa.

Ko a cikin mafi kusancin rundunar Kwankwasiyya, ana ganin ƙwarin guiwa na dusashewa. Wani mamba na caucus da ya halarci taron ya furta cikin rashin imani: “Alamu sun bayyana. Lokaci ya yi da jagoranmu, Kwankwaso, zai ja gefe don kare mutuncinsa kafin abubuwa su fi ƙarfinsa.”

Yayin da abubuwa ke ci gaba da bunƙasa, yiwuwar cewa watsi da taron yau zai zama tarihi da zai nuna shigowar sabon yanayi a siyasar Kano .