BABBAR KOTUN KANO TA YANKE WA MUTANE BIYU HUKUNCIN KISA TA HANYAR RATAYA KAN KASHE MACE DA ’YA’YANTA SHIDA

Babbar Kotun Jihar Kano mai lamba 11, da ke zamanta a Bompai, ta yanke wa wasu mutane biyu, Umar Auwal da Yakubu Dayyabu, hukuncin kisa ta hanyar rataya bayan samunsu da laifin kashe wata mata, Fatima Abubakar, da ’ya’yanta shida a unguwar  Chiranci da ke cikin Jihar Kano.

Mai shari’a Nasiru Saminu ne ya yanke hukuncin a ranar Juma’a, 6 ga watan Nuwamba, 2026, bayan kotun ta yi nazari kan hujjoji da shaidun da aka gabatar mata a yayin shari’ar.

Kotun ta samu Umar Auwal, wanda aka fi sani da Breaker, da Yakubu Dayyabu, wanda aka fi sani da Wawo, da laifin kashe Fatima Abubakar da ’ya’yanta shida a ranar 17 ga watan Janairu, 2026.

Sakamakon haka, kotun ta yanke wa kowannensu hukuncin kisa ta hanyar rataya sau bakwai, wanda ya yi daidai da adadin mutanen bakwai da aka kashe a wannan mummunan lamari.

Haka kuma, kotun ta yanke wa mutanen biyu hukuncin ɗaurin rai da rai bisa laifukan haɗa baki wajen aikata laifi da kuma fashi da makami.

Sai dai kotun ta sallami tare da wanke wani mutum mai suna Isiyaku Yakubu daga zargin haɗa baki da ake yi masa dangane da kisan mutanen bakwai.

Lauyoyin masu gabatar da kara sun haɗa da  Babban Lauyan Gwamnatin Jihar Kano, kuma Kwamishinan Shari’a, Abdulkarim Kabir Maude, tare da Barrister Salisu Muhammad Tahir.

A gefe guda kuma, Barrister J. I. Musa da Barrister A. I. Baba ne suka wakilci waɗanda ake tuhuma.

Wannan hukunci ya zama wani muhimmin mataki a shari’ar kisan gillar da ta faru a Chiranci, wadda ta girgiza al’umma sakamakon mummunan kisan da aka yi wa uwa da ’ya’yanta shida.