NUJ Kano Ta Bukaci Al’umma Su Tallafa Wa Kwamitin Yaƙi da Shan Miyagun Ƙwayoyi, Ta Yi Kira da a Kiyaye Zaman Lafiya Gabanin Zaɓen 2027

Ƙungiyar ’Yan Jarida ta Ƙasa (NUJ), reshen Jihar Kano, ta yi kira ga al’ummar jihar da su ba da cikakken goyon baya da haɗin kai ga Kwamitin Haɗin Guiwar Hukumomi da Gwamnatin Jihar Kano ta kafa domin yaƙi da matsalar shan miyagun ƙwayoyi, domin ba shi damar gudanar da ayyukansa yadda ya kamata.

Wannan kira na ƙunshe ne cikin sanarwar ƙarshe (Communiqué) da ƙungiyar ta fitar bayan kammala taron majalisar wakilai (Congress Meeting) da ta gudanar a ranar Asabar, 31 ga Oktoba, 2026, a babban zauren taro na Cibiyar ’Yan Jarida (Press Centre), Kano.

A cikin sanarwar, majalisar ta yaba wa Gwamnatin Jihar Kano bisa kafa Kwamitin Haɗin Guiwar Hukumomi domin yaƙi da shan miyagun ƙwayoyi, tare da naɗa Barr. Muhuyi Magaji Rimingado a matsayin shugaban kwamitin.

Ƙungiyar ta bayyana wannan mataki a matsayin wani muhimmin ƙoƙari na tunkarar matsalar shan miyagun ƙwayoyi da ke addabar al’umma, tare da yin kira ga mazauna jihar da su ba kwamitin haɗin kai da goyon bayan da ya dace domin samun nasarar gudanar da aikinsa.

Kira ga ‘Yan Siyasa Su Guji Tayar da Fitina Gabanin Zaɓen 2027

Dangane da harkokin siyasa da ke ƙara ɗaukar zafi gabanin babban zaɓen shekarar 2027, majalisar ta yi kira ga ’yan siyasa da sauran masu ruwa da tsaki da su gudanar da harkokinsu na siyasa bisa ƙa’idoji da dokokin da hukumomin da abin ya shafa suka shimfiɗa.

Haka kuma, ta gargaɗe su da su guji siyasar daba, kalaman ƙiyayya da kuma furta kalaman ɓatanci ko cin mutunci ga juna, waɗanda za su iya kawo barazana ga zaman lafiya, haɗin kai da zaman tare tsakanin al’ummar jihar.

NUJ Ta Bukaci Gwamnati Ta Dauki Matakin Magance Rikicin Manoma da Makiyaya

A wani ɓangaren kuma, majalisar ta yi kira ga Gwamnatin Jihar Kano da ta gaggauta ɗaukar matakan shawo kan rikice-rikicen manoma da makiyaya da ke sake faruwa a sassa daban-daban na jihar.

Ta jaddada muhimmancin ɗaukar matakan kariya tun kafin faruwar rikici, domin hana ci gaba da asarar rayuka da lalata dukiyoyi, tare da samar da kyakkyawar dangantaka da zaman lafiya tsakanin al’ummomin manoma da makiyaya.

Kiran Ƙara Wayar da Kan Al’umma Kan Kariyar Gobara

Haka kuma, majalisar ta buƙaci gwamnatin jihar da hukumomin da abin ya shafa da su ƙara ƙaimi wajen gudanar da shirye-shiryen wayar da kan jama’a game da hanyoyin kariya daga gobara da kuma matakan tsaro, musamman ganin yadda lokacin hunturu (Harmattan) ke gabatowa.

Ta bayyana cewa irin wannan wayar da kai zai taimaka wajen rage aukuwar gobara da kuma mummunan illar da take haifarwa ga rayuka da dukiyoyin al’umma.

NUJ Ta Yaba Wa Gwamnati Kan Inganta Ruwan Sha a Kano

Dangane da batun samar da ruwan sha, majalisar ta yaba wa Gwamnatin Jihar Kano bisa ƙoƙarin da take yi na farfaɗo da tsarin samar da ruwa, wanda ya taimaka wajen inganta samun ruwan sha mai tsafta a cikin birnin Kano.

Sai dai ƙungiyar ta buƙaci gwamnatin da ta faɗaɗa irin wannan ƙoƙari zuwa yankunan karkara, domin tabbatar da cewa al’ummar da ke zaune a ƙananan hukumomi da ƙauyuka su ma sun samu damar amfani da tsaftataccen ruwan sha.

NUJ Ta Yaba Wa Gwamna Kan Sauye-Sauyen Ministoci, Ta Nemi A Naɗa ƙwararren Ɗan Jarida a Ma’aikatar Yaɗa Labarai

Majalisar ta kuma amince da sauye-sauyen da Gwamnatin Jihar Kano ta yi a majalisar zartarwa (Cabinet Reshuffle), inda ta bayyana hakan a matsayin wani mataki na ƙarfafa shugabanci da inganta ayyukan gwamnati.

Bugu da ƙari, majalisar ta yi kira ga Gwamna Abba Kabir Yusuf da ya yi la’akari da naɗa ƙwararren masani daga fannin aikin jarida a matsayin Kwamishinan Yaɗa Labarai da Harkokin Cikin Gida.

Ta bayyana cewa ma’aikatar tana da muhimmiyar rawa wajen yaɗa sahihan bayanai, sadarwa tsakanin gwamnati da al’umma da kuma inganta fahimtar manufofin gwamnati.

Kiran Ƙara Wayar da Kan Masu Amfani da Hanyoyi Domin Rage Haɗurran Mota

A wani ƙuduri, majalisar ta yi kira ga hukumomin kula da zirga-zirgar ababen hawa da su ƙara ƙaimi wajen wayar da kan masu amfani da hanyoyi game da dokokin hanya da matakan kariya daga haɗurran mota.

Ta jaddada cewa akwai buƙatar ƙara wannan aiki musamman a daidai lokacin da ake ci gaba da gudanar da ayyukan raya ababen more rayuwa na hanyoyi, tare da ƙaruwar zirga-zirgar ababen hawa a cikin birnin Kano.

NUJ Kano Ta Samu Damar Karɓar Bakuncin Taron Tsaro na Kafafen Yaɗa Labarai na Arewa maso Yamma

Dangane da taron tsaro na kafafen yaɗa labarai na shiyyar Arewa maso Yamma (North-West Media Security Summit) da ake shirin gudanarwa, majalisar ta nuna jin daɗinta tare da yaba wa shugabancin NUJ reshen Jihar Kano bisa nasarar samun damar karɓar baƙuncin wannan muhimmin taro a Jihar Kano.

Majalisar ta bayyana wannan nasara a matsayin wata babbar nasara ga ƙungiyar NUJ Kano da kuma harkar aikin jarida baki ɗaya.

An Cike Matsayin Mataimakin Sakatare na NUJ Kano

Haka kuma, a yayin taron majalisar, an samu cike gurbin muƙamin Mataimakin Sakatare (Assistant Secretary) wanda ya kasance babu mai riƙe da shi.

An naɗa Comrade Mubarak Ismaila Madungurum, ƙwararren ɗan jarida mai aiki da gidan talabijin na ARTV Kano, a matsayin wanda zai riƙe wannan muƙami.

NUJ Ta Yi Addu’ar Rahama Ga Abokan Aiki da ‘Yan Uwa da Suka Riga Mu Gidan Gaskiya

A yayin taron, majalisar ta gudanar da addu’o’i na musamman domin roƙon Allah Maɗaukakin Sarki Ya jiƙan abokan aiki da ’yan uwan da suka rasu.

Daga cikin waɗanda aka yi addu’ar sun haɗa da Ismaila Garba Gwammja; mahaifiyar Mataimakin Shugaban NUJ Kano, Comrade Mustapha Gambo; da kuma matar Comrade Dahiru Ibrahim Biso.

Majalisar ta roƙi Allah Maɗaukakin Sarki Ya gafarta musu kura-kuransu, Ya sanya su cikin Aljannatul Firdaus, sannan Ya ba iyalansu da sauran ’yan uwansu haƙurin jure wannan babban rashi.

Kwamitin Shirya Sanarwar (Communiqué Committee)