Ana Zargin Shugaban ASUSS na Kano da Rashin Da’a, Ana Kira da a Dauki Matakin Ladabtarwa Kan Zargin Cin Zarafin Principals
Shugaban ƙungiyar Academic Staff Union of Secondary Schools (ASUSS) na Jihar Kano, na fuskantar kakkausar suka biyo bayan zarge-zargen rashin da’a da cin zarafi da ake yi masa kan wani shugaban makaranta a yayin wani taron bita na hukuma.
Rahotanni sun bayyana cewa lamarin ya faru ne a lokacin wani taron horaswa na musamman na kwanaki uku da aka shirya wa shugabannin makarantun sakandare na Jihar Kano, wanda aka gudanar a Jihar Kaduna daga ranar 26 zuwa 28 ga Maris, 2026.
Wasu daga cikin shugabannin makarantun, ciki har da Principal na GGASS Garun Babba, Malam Abubakar Ahmed—wanda ake zargin an yi wa abin—sun yi Allah wadai da abin da suka bayyana a matsayin halin wulakanci da rashin ƙwarewa da Yalo ya nuna a yayin taron. A cewarsu, rikicin ya samo asali ne daga batun wurin zama a cikin dakin taron, duk da cewa ba a ware wa kowa kujera ta dindindin ba.
Da yake magana da manema labarai, Abubakar Ahmed ya bayyana cewa a ranar 27 ga Maris, wato rana ta biyu na taron, yana zaune tare da abokan aikinsa sai chairman, tare da wasu mutane, suka zo suka umurce su da su tashi daga kujerun da suke zaune, suna cewa an riga an tanadi wuraren tun ranar farko. Bayan ya ƙi tashi, ana zargin Yalo ya ture shi daga kujerarsa, ya yi masa zagi, sannan tare da taimakon wasu magoya bayansa suka yi yunƙurin dukan sa kafin wasu su shiga tsakani.
Ahmed ya ƙara da cewa bai taɓa sanin Yalo ba a baya, kuma shi ma ba memba ba ne na ƙungiyar ASUSS.
Wasu shaidun gani da ido sun kuma yi zargin cewa irin wannan hali ba sabon abu ba ne, inda suka ce chairman yana da tarihin cin mutuncin jami’an ilimi da kuma amfani da matsayinsa na shugaban ASUSS ta hanyar da ba ta dace ba. Sun kawo misalan wasu abubuwan da suka faru a baya, ciki har da zargin sauke wasu Principals daga mukaman jagoranci a ƙungiyar bayan halartar taron ƙasa na ANCOPSS, da kuma yunƙurin takaddama da wani Darakta a lokacin wata hira ta karin girma a Hukumar Kula da Makarantun Sakandare ta Jihar Kano (KSSSSMB).
Duk da waɗannan zarge-zarge, masu suka sun ce har yanzu hukumomin ilimi da KSSSSMB ba su ɗauki wani matakin ladabtarwa a kan shi.
Bayan sauraron bayanin da chairman ya yi, ya bayyana cewa bai yi wata takaddama ko faɗa da Principal Abubakar Ahmed ba. Sai dai ya amince cewa ya matsar da shi daga kujerar da yake zaune a kai, sannan ya sa wata kujera ya zauna a wurin. Yalo ya kuma ce Abubakar Ahmed ya ba shi haƙuri a matsayinsa na shugaban ASUSS, sannan ya koma wani wuri ya zauna.
Masu ruwa da tsaki yanzu suna kira ga Gwamnatin Jihar Kano da hukumomin ilimi da abin ya shafa da su gaggauta bincike kan lamarin tare da ɗaukar matakin da ya dace, suna jaddada cewa duk mai irin wannan hali bai cancanci rike muƙamin shugabanci ba.
