Inuwa Waya Ya Bukaci Goyon Bayan Gwamna Yusuf, Ya Kuma Yi Kira Ga Shugabanni Su Zuba Jari A Ci gaban Matasa

Fitaccen lauya kuma tsohon babban jami’i a Kamfanin Man Fetur na Kasa (NNPC), Inuwa Waya, ya bayyana goyon bayansa ga sauyin jam’iyyar Gwamnan Jihar Kano, Abba Kabir Yusuf, zuwa jam’iyyar All Progressives Congress (APC), tare da kira ga karin bai wa matasa dama da kuma gudanar da siyasa cikin gaskiya da rikon amana.

Waya ya bayyana hakan ne yayin wata tattaunawa da ‘yan jaridar yanar gizo karkashin kungiyar Online Media Chapel a Kano, inda ya kuma sanar da janyewarsa daga takarar gwamna a zaben shekarar 2027.

Ya bayyana cewa matakin janyewarsa ya biyo bayan bayyanar wasu ‘yan takara masu irin akidarsa, da kuma yadda ya kimanta ayyukan gwamnatin da ke mulki, inda ya lura cewa da dama daga cikin manufofin yakin neman zabensa na 2023 na samun aiwatarwa a karkashin gwamnatin Yusuf.

Yayin da ya bayyana gwamnan a matsayin “ginshikin siyasa mai muhimmanci,” Waya ya ce sauya sheka zuwa APC wani mataki ne na dabara da zai inganta shugabanci, karfafa hadin kai da gwamnatin tarayya, tare da hanzarta ci gaba a Jihar Kano.

A cewarsa, rikice-rikicen da ke addabar jam’iyyar New Nigeria Peoples Party (NNPP), wanda ya hada da bangaranci da shari’o’i masu tsawo, ya sanya zama cikin jam’iyyar hadari ga gwamnan. Ya kara da cewa hadewa da jam’iyya mai mulki a matakin kasa na samar da kwanciyar hankali da hadin kai da ake bukata domin ingantaccen shugabanci.

“Matakin da Gwamna Yusuf ya dauka ya samo asali ne daga lissafin siyasa na mayar da hankali wajen kawo ribar dimokuradiyya ga al’umma,” in ji Waya.

Ya kuma lura cewa wannan mataki ya taimaka wajen rage zafin siyasa a Kano, tare da rage gaba da kuma samar da yanayi mai kwanciyar hankali ga gudanar da mulki.

Waya ya jaddada wasu nasarori na gwamnatin yanzu, ciki har da gyare-gyare a harkar filaye, gina ababen more rayuwa, sabunta birane, da kokarin magance matsalar ruwa ta hanyar hadin guiwa da kasashen waje. Haka kuma ya ambaci ci gaba a bangaren ilimi, kiwon lafiya, inganta aikin gwamnati, da gudanar da kananan hukumomi a matsayin alamomin nasara.

Ya yaba da matakan da gwamnati ke dauka na tsaftace tsarin filaye, dakile magudi, da gurfanar da masu laifi, yana mai bayyana gyaran tsarin filaye a matsayin muhimmi ga zaman lafiyar al’umma da bunkasar tattalin arziki.

Game da ci gaban matasa kuwa, Waya ya yi gargadi mai karfi kan amfani da matasa wajen tada rikicin siyasa, inda ya bukaci ‘yan siyasa su zuba jari a ilimi, samar da ayyukan yi, da kuma bunkasa rayuwar matasa gaba daya.

Ya jaddada cewa dole ne matasa su sake fasalin kansu a matsayin masu kawo canji mai kyau maimakon zama kayan tada zaune tsaye.

“Siyasa ya kamata ta zama hidima da ci gaba, ba hanyar tara dukiya ba tare da tasiri ba. Matasa su tashi tsaye, su shiga siyasa cikin gaskiya, su kuma taka rawa wajen tsara makomar wannan kasa,” in ji shi.

Yayin da ya kawo misali na duniya, Waya ya yi nuni da yadda Julius Malema ya taso a siyasar Afirka ta Kudu, yana mai cewa motsin siyasar da matasa ke jagoranta na iya kawo sauyi idan aka shiryar da shi yadda ya kamata.

A karshe, ya bukaci al’ummar Kano su mara wa gwamnatin Gwamna Yusuf baya, yana mai cewa gwamnati ta nuna kudirin dawo da martabar jihar, kuma tana bukatar goyon bayan kowa domin cimma burinta.

Waya ya kuma jaddada cewa gina ingantaccen tsarin siyasa na bukatar hakuri, ladabi, da hadin kai wajen mayar da hankali kan ci gaban al’umma.

Madogara : Alfijir labarai