BA A DAIDAITA SIYASA DA KARFI, MASALAHA DA BIN DOKA AKE BUKATA
A sakamakon sabon rubutun da tsohon Kwamishina,Hon. Muhammad Sanusi Kiru ya wallafa kan abin da ya kira “sake daidaita siyasa” ya jawo muhawara mai zafi a fagen siyasar Kano da ya mutsa Hazo . A cikin rubutunsa, Kiru ya bayyana batun musabaha mai faɗi da kuma abin da ya kira “tarihin shigowar” Gwamna Abba Kabir Yusuf zuwa jam’iyyar All Progressives Congress (APC). Sai dai masu sharhi na ganin a bayan wannan lafazi mai kayatarwa akwai yunƙurin wasu ‘yan siyasa da suka rasa madafun iko na sake kwace ragamar gwamnati ta hanyar da ba ta dace ba.
Masu sukar wannan tsari sun ce kare tsarin kwamitocin sauyin mulki da aka fifita tsofaffin ‘yan siyasa na zamanin baya a kan jami’an gwamnati masu aiki yanzu shi ne mataki na farko na abin da suke kira “Dokin Trojan” — dabara ta kutse cikin gwamnati maimakon haɗin kai na gaskiya.
Bayanin Masu Sharhi
A cewar masu sharhi, Kiru ya nuna cewa “ba harkar da ta saba ba ce,” amma jama’ar Kano sun san cewa wannan “tsohuwar harkar” ita ce zamanin waɗannan ‘yan siyasa da ake ƙoƙarin dawo da su. Domin Sanya Muhammad Garba a matsayin shugaban wani muhimmin kwamiti, a kan Kwamishinan da ke aiki, Ibrahim Abdullahi Waiya, ana kallonsa a matsayin saƙo cewa tsofaffin jagororin suna son su tsara sabuwar tafiyar siyasar Gwamna da kansu.
Masu fashin baki sun ce wannan ba “masalaha ba ce ba kuma babu maganar haɗin kai a cikin wannan yunkuri” domin hakan ya nuna a fili cewa, yunƙuri ne na janye muƙaman da magoya gwamna Abba su ke rike da su domin mayar da muƙaman hannun mutanen tsohuwar gwamnati . A ganinsu, wasu daga cikin waɗanda ke kiran kansu gogaggun ‘yan siyasa ba su zo ne domin su mara masa baya ba — sun zo ne domin su haɗiye tafiyarsa.
APC A Matsayin Makami
Ko da yake shigowar Gwamna cikin APC an bayyana shi a matsayin mataki na dabaru domin ci gaban Kano da daidaita jihar da cibiyar tarayya, ana zargin wasu na amfani da wannan haɗewar jam’iyya wajen rama tsoffin rigingimu. Rahotanni sun nuna cewa ana ƙoƙarin maye gurbin mambobin majalisar zartarwa masu biyayya da suka tsaya tsayin daka a lokacin fafutukar siyasa, yayin da waɗanda suka ci gajiyar mulkin da ya gabata ke neman dawowa da ƙarfi.
Kalmar Kiru da ta ce wasu su “shirya kansu domin sabon yanayi da za a sake tsara mukamai” ta fusata masu ruwa da tsaki. Sun fassara hakan a matsayin barazana kai tsaye ga tawagar Gwamna ta farko — kamar ana cewa: “Mun zo yanzu, kuma za mu karɓi kujerunku.”
Biyayya Ko Son Rai?
Masu sukar Kiru sun tambaya: ina wannan biyayya take a lokacin da aka gina hangen “Sabon Kano” a zafin zaɓen 2023? A cewarsu, Waiya da sauran mambobin majalisar ne suka kare wannan hangen nesa a lokacin da wasu daga cikin waɗanda ake kira “mahimmaman tsofaffi” ba su bayyana ba.
Su na ganin kiran da Kiru ya yi ga waɗannan jami’ai da su yi shiru kan korafe-korafensu babban ruɗu ne na siyasa — yunƙurin sa ‘yan amana su yi shiru domin wasu su ci moriyar sabon yanayi cikin sauƙi.
Kammalawa: Ku Yi Hankali Da Kyautar Da Ke Ɗauke Da Haɗari
Masu sharhi sun gargadi Gwamna Abba Kabir Yusuf da ya yi taka-tsantsan da abin da ake kira “tsari mai haɗin kai.” A cewarsu, musabahar da ke buƙatar a sadaukar da mutunci da matsayi ba zaman lafiya ba ce — buƙatar mika wuya ce.
A ƙarshe, ana kira ga Gwamnan da ya duba wannan lamari da idon basira. A fahimtar masu sukar, waɗannan “tsofaffin ‘yan siyasa” ba su zo ne domin gina gadon mulkinsa ba, sai dai domin su sake gina daulolinsu da suka rushe. Idan aka bari wannan “Dokin Trojan” ya shiga tsakiyar gwamnatinsa, akwai fargabar cewa abin da aka kira “sake daidaita tarihi” na iya ƙarewa da Gwamna ya zama baƙo a Gidan Gwamnati.
