KU BA WA INEC TSARO A ZABUKAN CIKE GURBI NA JAHOHIN KANO, RIVER DA FCT ABUJA- TUNUBU
Shugaban Ƙasa, Bola Ahmed Tinubu, ya yi kira ga masu kaɗa ƙuri’a, hukumomin tsaro da jami’an Independent National Electoral Commission (INEC) da su gudanar da ayyukansu cikin tsari da natsuwa yayin zaɓen da za a yi ranar Asabar a Babban Birnin Tarayya da kuma jihohin Kano da Rivers.
INEC za ta gudanar da zaɓe a ƙananan hukumomi shida na Babban Birnin Tarayya (FCT), tare da zaɓen cike gurbi a mazaɓun Ahoada East II da Khana II na Jihar Rivers, da kuma mazaɓun Kano Municipal da Ungogo a Jihar Kano.
Shugaba Tinubu ya buƙaci dukkan masu haƙƙin zaɓe su fito su kaɗa ƙuri’arsu ba tare da tsoro ba, yana mai jaddada cewa dimokuraɗiyya na bunƙasa ne a cikin yanayi na kwanciyar hankali, haƙuri da mutunta juna.
Ya kuma yi kira ga jam’iyyun siyasa, ‘yan takara da magoya bayansu da su guji duk wani nau’i na tashin hankali, kalaman tunzura jama’a ko wasu ayyuka da za su iya tauye sahihancin tsarin zaɓe.
Shugaban ya gargaɗi hukumomin tsaro da su kauce wa duk wani nau’i na wuce gona da iri, tsoratarwa ko matakan da za su hana masu zaɓe yin haƙƙinsu, yana mai jaddada cewa an girke jami’an tsaro ne domin kare rayuka da dukiyoyi tare da tabbatar da mutuncin ƙuri’a.
Haka kuma, ya roƙi Hukumar INEC da ta ɗauki dukkan matakan da suka dace domin ƙarfafa amincewar masu zaɓe ta hanyar tabbatar da yin tantance masu kaɗa ƙuri’a a kan lokaci, gudanar da zaɓe cikin sauƙi, tattara sakamako cikin gaskiya da kuma watsa su ba tare da ɓata lokaci ba, daidai da tanadin Dokar Zaɓe ta 2026.
“‘Yan Najeriya ma’abota ƙauna, ina tabbatar muku cewa Gwamnatin Tarayya ƙarƙashin jagorancina za ta ci gaba da tallafa wa hukumomin da ke da alhakin gudanar da zaɓe cikin ‘yanci, adalci da gaskiya.
“Ga mazauna Babban Birnin Tarayya, Kano da Rivers, ina yaba muku bisa wayewar kai da kishin ƙasa. Ina da yaƙinin cewa wannan zaɓe zai nuna ainihin muradin al’umma tare da ƙara ƙarfafa tafiyar dimokuraɗiyyarmu a matsayin ƙasa,” in ji Shugaban.
Bayo Onanuga
Mai Ba Shugaban Ƙasa Shawara na Musamman
(Yaɗa Labarai da Tsare-tsare)
20 ga Fabrairu, 2026
